استغلال الوظيفة؟
دائما ما كنت أسمع وأرى كثير من الإخوة من العاملين في الدوائر الحكومية وحتى شبه الحكومية والخاصة ، يقومون باستغلال لوظائفهم وللعمل الذي يقومون به
فمثلا هذا موظف في اتصالات يستخرج ارقام مميزه لاصدقائة، واخر يخبرهم عن معلومات خاصه عن بعض المشتركين
وااخر في الشرطه يعلم اصحابه عن ارقام هواتف للبنات طبعا بعد ماربيعه يعطيه رقم سيارتها؟
طبعا غير عن الذين يستغلون سيارات الدوام التي اعطيت لهم لاستخدام العمل، في مشاويرهم الخاصة ورحلاتهم العائلية
والبعض يمشي شغل فلان من الناس مقابل انه يمشيله شغله بعد في دائرته ….يعني وحده بوحده؟؟؟
فالحقيقة تعرضت انا لكثير من مثل هذه المواقف خلال عملي السابق والحالي ايضا؟
ومما جعلني اكتب واتطرق لهذا الموضوع هو لسبب الموقف الاخير الذي تعرضت له قبل يومين من احد الاصدقاء والذي هو ايضا يعتبر احد المسؤولين في الدوائر الحكومية ، واليكم ما حصل
قبل يومين كنت يالس ويا الشباب في الكوفي، وفي العاده نتحاور ونتكلم عن الكثير من المواضيع والامور الحياتية والفكاهية المختلفه، لكن وبحكم عملي، دائما اجد صديقي فلااان يسالني عن المشاريع والجديد الذي ستقام ضمن منطقته السكنية الجديدة، وذلك لانه قام ببناء فلل سكنية للاستثمار فيبا يعرف شو حولينه عسب على اساسه يحدد الايجارات اذا يحطها مرتفعه ولا واطيه؟
طبعا اتم اتكلم معاه عن المشاريع بشكل عام وما يتم اعلانه من قبل وسائل الاعلام او الشركات نفسها فقط ولا اتطرق لباقي الامور
لكن قبل يومين طلب مني اني اييبله خرائط ورسومات موضح بها التصميم الشامل للمنطقه وماذا سيكون بها ؟؟؟
فاستغربت من طلبه؟ واصلا ليش يطلبني مثل هل شي؟ فسالته ليش تريدها؟
قال ابي اعرف شو حوليني
قتله ااسف ماقدر
قال ليش؟ انت الخرايط عندك؟
قتله صح بس هذا استغلال لوظيفتي ولولا اني كنت موظف في هل مكان ولا ما كنت بروم احصلهم واعرفهم
قالي انا عندي ربيعي يشتغل في المكان الفلاني يجيبلي الخرايط وكل المعلومات الي ابيها
قتله سير اطلب منه عيل لاني ماستغل وظيفتي ولا المكان الي انا يالس فيه لهل اسباب او اي سبب ثاني؟؟؟
طبعا الريااال مد بووووووز جنه خرطوووم فيل
وظل زعلان مني
فالله الله في وظائفكم وحللو رواتبكم لان الراتب الي ينزل عيالك واهلك ياكلون منه ولو كان من مصدر حرام او استغلال لما انت فيه من منصب فترى ربي بيظهره في عيالم واهلك وفيك؟؟؟
بس انا مستانس اني رديت بهل رد وريحت ظميري
ومثل هل نوع من الصداقاات ،،، انا ماباها وانا في غنى عنها
والله الغني
تحياتي
و اخيرا و بعد مرور عدة مواضيع ….. انا اول رد
بالنسبه لموضوعك هالشي وايد منتشر و انا صارتلي مواقف واااايد مثلا قبل فترة اتصل علي ريال يقولي ابي ارمسج و من هالسوالف صكيت بويهه جان يرد يقولي انا ما خليتج تندمين على هالحركه بطلع كل شي عنج اوني اروم احطمج يوم خبرت امايه قالتلي ما يروم لان رقم فوني بإسم اخوي فقالتلي حطي بطيخه ع بطنج و ارقدي
شي ثاني قبل جم من سنه عمتي دعمت بالغلط واحد جان يقولها انا مستعد اصلح سيارتي على حسابي بس تتعرفين علي .. ولا بييب معلومات عنج
مدري شو يستفيدون يوم يسوون هالاشياء يمكن يحسون بقيمتهم ولا مدري شو
ادري طلعت شوي عالموضوع بس احسه نفس الموضوع
اختك
باربيووه
مرحبا سالم …
زين ما سويت فيه ..والله يحفظك لأهلك وعياللك …
هاذي السماعدات صايرة وايد منتشرة يعني ..ساعدني بساعدك..وهي نوعا ما
تعتبر شبه الرشوة والرسول-صلى الله عليه وسلم- لعن الراشي والمرتشي والقائم عليها (يعني الوسيط اللي بينهم ) والله يحفظنا
لانه فيه تفضيل لناس او فئة معينة قد لا تستحق هذا الشيء في مقابل ناس قد تكون محتاجة …
وســـــــــــلامتكم
فــراولة بالشكولاته
مرحبا سالم
الصراحه مواضيعك قامت تصير احلى واحلى الصراحه انا طبعا ما استغرب منك هذا الشي هذا طبعك وللاسف هذا ربيعك مفروض انه يكون عارف شخصيتك
والله ما اقول الى الله يقويك في خدمة الوطن والمواطن واحب اقول لجميع الاخوان ترى والله بلادنا تستاهل مننا كل خير لانه الله يطول بعمار الشيوخ مو مقصرين
وهذيل الناس اصحاب النفوس الضعيفه والله لو يحب بلاده ما بيستغل الثقه الى عطوها اياه وانا من الناس الي مريت في مواقف كثيره جدا من الناس الي تستخل وضيفتها
بس اكيد ب ما ارضى اني حتى اعرف اي شيء مايخصني وبعدين واللاهم والله يا جماعه
والله ترى ما اعتقد انه في اي شيء معقد الي يبي رقم ياخذه بفلوس والي يبي يستفسر يراجع ويستفسر والي ما عندها طريقه وعنده مشكله عليه بستوديو واحد والحمد لله على النعمه واشكرك يا سالم على الموضوع الطيب
بـــــــوســــــالــــم البريكي
طرح ممتاز ..
بس بقولك…!! اللحين اذا احنا مشينا على كلامك وهذا اللي صاير طبعا
بنصير مظلومين …ادري الله مايظلم احد ..بس حقوق مافيه في زمن المصالح
اذا كان صاحبك واللي مثله موجودين…
وللامانه والله يسامحني ان شاء الله فيه امور ماتمشي الا بالواسطه ..بس مش على حساب الغير..لان بهالوقت صرنا حتى حقوقنا عشان ناخذها لازم واسطه
الموضوع والتعليق يطول لو باخذه بالتفصيل ومن جميع نواحيه
تسلم ياسالم
وتقبل مروري
باااربيوووه
اللع يبعد عنج وعن عمتج عيال الحرام والمغازلجييين لووول
وتستاهلين المشاركة الاولى باربيووووه ومشكووورة على تواجدج الدايم
فراولة بالشوكولاته
ممكن نعتبر هذا واسطه ايضا بس ما كنت اقصده اكثر هو ان استغل منصبي وسيارة الدوام واسم الدواام في اشياء خاااصة
مثلا في مفتشين في البلدية مثلا كنت اعرفهم في السابق يذهبون الى محلات الخضرة والبقالات وياخذون الاغراض بدون حساب او بخصم 50% ؟؟؟ مقابل انهم مايخالفون اصحاب المحلاااات؟؟؟ بس الحمدلله هل اشياء خفت وايد الحييييين
تسلمين عمرورج فراولة
بوسالم
تعرف انك يوم تكون ويا ربعك اتكون تضحك وتسولف ومن النادر تتعرضون لموقف جدية بالتالي صعب شويه ان شخصيتي تنعرف بسهوله
وانت عارف انا متى اكون جااد متى اضحك محد يعرف ؟؟؟؟؟ لوووول
تحياتي عمرورك
نوته
اول شي مشكورة عمرورج الاول في مدوني اختي نوته
وانا صراحه اتفق وياج في الي قلتيه ان في امور ماتمشي الا بالواسطه في هل زماان
مثل ما قلتي كل شي صار مصالح مب بس المشاغل
الشغل
الصداقة
الزواج
الحب
الضحك
النفاااق
كل شي صااار مقابل مصلحه مافي شي بلاااااش؟ لول
احييج على واقعيتج في الحياه
تحياتي نوته
شوف اخوي سالم.
احاول استغل وظيفتي … لخدمه المحتاج…
اساعد في تجاوز العقبات الي تحاصر المراجعين ..
مااخترق قوانين واتجاوزها لكن اسهل ..
تحياتي لك وزمان عن مدونتك
بسمة
مثل ماتفضلتي اختي بسمة ما تخترقين القوانين ولكن اتسهلين اصلا هذا مطلبوب منا وهذا دورنا
تحياتي بسمة وهي لج زمان عن المدونه وانا معاتبج على هل شي لول
لاتعيديها لول
تحياتي
ملوكه بااااك
الصراحه الموضوع وايد حلو وعيبني لاني احس انه
هالظاهره منتشره بالهبل بالبلاد والله يعيينا بس
بس اذا ابي اطلع ليسن ماايستوي اخلي احد يتوصتلي مثلا *_^
وله مثلا بطلع سياره يديده ماايستوي اخلي احد يطلعلي رقم حلو
مع تحياتي للجميع
Malaaak_UAE
a7yeeK Salem 3la a5laaqeK il3aalya : )
Malaaak_UAE
انا اعتقد ان لا ما يستوي اتطلعين سيارة ويديدة ولا رقم يديد
خلييييج على دراستج وكتبج احسلج
ومثل مايقولون كل شي بوقته حلووووو
ولا شو رايج لوووووووول
DUBAI
مشكوووورة دبي على مديحي وانتي طبعا عااارفه مدى علو اخلاقي وكلش ما عندي لسااان طويييل لوووول
مشكوووورة على مرورج العالي لول
بس ما قلتيلنا كيف كان العرس؟ لوووول
DUBAI
مشكوووورة دبي على مديحي وانتي طبعا عااارفه مدى علو اخلاقي وكلش ما عندي لسااان طويييل لوووول
مشكوووورة على مرورج العالي لول
بس ما قلتيلنا كيف كان العرس؟ لوووول
موضوعك عيبني
ولو الناس ما يتعاملون بهالاسلوب جان ما كثرت الواسطات وصار اي شي تريده لازم ادور لك ع واسطه
ابنة الاسلام
صدقتي اختي ابنة الاسلام لو نتغاضى عن مصالحنا الخاصة وانجوف مالح الناس وخوف ربنا جدامنا مابتكثر نفس هالتصرفات وحتى الرشاوي
بس ايمان الانسان ومعتقداته وتربيته هي الي تبين
ومره قالي واحد اجنبي قبل عدة سنوات
الوواسطات ما تتواجد الا فالمجتمعات المتخلفة؟؟؟
وللاسف نحن العرب بعدنا في العالم الثالث؟؟
تحياتي