الطيبون للطيبات والخبيثون للخبيثات
صراحة ماعرف كيف ابتدي بهل تدوينه لكني راح ابدي بعنوان هل تدوينه وبالايه القرانية الي قال فيها ربنا عز وجل ” الطيبون للطيبات والخبيثون للخبيثات“!؟
هذه الايه وايد قريتها ووايد سمعتها في الصلاه ومن ناس يقرون القران وكنت دوم اسال عمري كيف جي!؟ كيف انا طيب زوجتي بتكون طيبه واذا انا خبيث زوجتي بتكون خبيثه وشي مثبت بايه قرانية؟؟
وايد حالات جفتها في حياتي وتجاربي مع ناس عاشرتهم اجووف ان الزوج يكون طيب ومسكين بس زوجته اتكون نسرة وشرانيه ,,, اشفق على الريال واقول حرام ما يستاهلها وحتى انتو ممكن اتحسون بهل شي ،،،وفي احيان اخرى اتجوفون وحده اتقولون حرام هاي مظلومه ومكسورة الجناح ورايلها كذاب ونصاب وشراني ولوتي وراعي حريم وسوالف وغيره وغيره من المساوئ انقول حرام ما تستاهل واتحصلها هي نفسها اتقول انا مظلومة مع هل ريال وابي انصف عمري واعيش حياتي ودنيتي بعيد عن هل ريال الي ظالمني ومظيعه حياتي وشبابي وياه؟
بس كيف انتي مظلومه والله قال الخبيثون للخبيثات ؟؟؟ معناته في شي غلط؟؟؟
وصدق الله وكذب الباقون
اذا انت كنت مظلوم من زواجك او انتي يالي تبين الانصاف اتحسين انج مظلومه فاتاكدي ان الله ما يظلم عباده ،،، الله يمتحنهم ويختبرهم ويبتليهم عسب يحصلون الاجر وبعدين يعوضهم بما هو افضل من ذلك ،،، لكن اذا الله عوضك وانت رضيت بالخبيث الي عند فذلك لان انت في داخلك او داخلج خبث مثله ّّ؟ يمكن ما يتساوى مع خبثه هو بس في خبث باطني داخلج ما بينكشف الا لمن يعاشرج ويعرفج او يعرفك ويعيش وياك؟
المثل يقول ” قل لي من تصاحب اقل لك من انت” هذا اذا صاحبك فمابالك اذا زوجتك ولا زوجج؟
الكثير من الشباب فيهم سلبيات ماتحملها افكر اقول بخاطري الله يعين زوجته هذا كيف متحملتنه بس بعد فترة عن طريق الاهل اعرف ان نفس مواصفاته في زوجته !!؟
فاذا انت يالمظلوم او يالمظلومه اتجوفين ان رايلج جذاب ومكار ودنيء ومايستاهلج ومعذبج وياه في حياته فهذا لان انتي في داخلج مكارة وجذابه ودنيئة ونفس مستواه عسب جي الله خلاج من نصيبه ومستواه والعكس صحيح ،،، وايدين ناس رياييل يكونون طيبين وخلوقين ومتعاونين تعال جوف حريمهم والله نفس الريال لان العشرة اتاثر
مثل هل امور محد يعرفها منا الا يوم يعاشر ناس فيهم خبث باطني مثل ماذكرت ومحترفين في الحلف والجذب والغدر والخيانه في دمهم بس سبحان الله ما تعرف عنهم الا بعد ماتعاشرهم
مرة وحده يات عند وحده من اهلي كانت بتعرس ،،، قالتلها انتي رايلج طيب؟؟ قالتلها كيف عرفتي لول قالت لان الله قال الطيبون للطيبات وانتي طيبه فاكيد الله بيرزقج بواحد شراتج
الحياه مدرسة وتجارب والناس اجناس فيهم الطيب والكريم وولد الاصل وفيهم الخبيث والجذاب والدنيء الي حتى مستواه ما يسوى مستوى نعالك لو حتى بعت عمرك عشانه ،،، يبيعك ببيزه لانه خبيث وحقير؟ ويشتريك لانه ولد اصل والله مسخرنه للخير
فلازم نعرف الناس الي انعاشرهم او نتعامل معاهم وما ننخدع بدموع التماسيح ويكسرون خواطرنا او حتى ننخدع من ظحكهم وفكاهتهم وخفة دمهم لانك ما بتعرف الوجه الحقيقي الى ورا هل وجه الا عقب فوات الفوت وساعتها يمكن تكووون اتاخرت وااايد
فاذا جفت حد مظلوم او حتى طيب تذكر الايه ” الطيبون للطيبات والخبيثون للخبيثات” واتاكد اذا هو طيب فالله بينصفه بلي هو اخير منه وبيتمسك فيه وبيعوضه خيير ، اما اذا كان خبيث ولئيم فجازءة ومستواه نفس مستوى شريكه الي مثل ما يقولون عنه جزمه ،،، فالجزمه للجزمه.؟
ابتدي واختتم بنفس الايه
الطيبون للطيبات والخبيثون للخبيثات
تحياتي
مرحبا اخوي سالم
انا وياك بالسالفه اللي قلتها ان في بعض المرات يكون الزوج طيبه والزوجه شرانيه و العكس صحيح
بقولك عن تجربه عائليه …. واحد من اخوالي واااااايد طيب وعلى نياته و حرمته الله يستر منها لسانها متبري منها
ذكرتني بسالفه دوم اماية تقولي اياها …. تقولي انتي ( يعني انا ) لسانج متبري منج وطويل يباله قص …. شكله ريلج بيطلع مسكين .. اقولها احسن حلاته الريال لا كان مسكين والحرمه تستقوي عليه خخخخخخخخخ
بالنسبة للأيه القرآنيه اللي قلتها …. ما ابي افتي بس اظني المقصود منها الطيبون للطيبات بيكونوا بيوم القيامه …
تقبل مروري اخوي سالم
اختكـ
باربيـ ـ ـ الاماراتـ ـ ـ
كلامك قد يكون صحيحا اذا ما ربطته بالاية ولكن مثلما تفضلت فهي تكون بلاء من الله سبحانه وتعالى لرفع درجات المؤمن وتبديل سيئاته حسنات ولكن الايه لا غبار عليها
موضوع قوي شوي اخ سالم
عيناوي أصيل
باربي الامارات
الله يعين رايلج عيال على لسانج ….شو انتي ضفدع لسانج طوييل لووول …مش مهم طولة اللسان ياباربي المهم انتي قلبج كيف المهم كيف اتحبينه رايلج هذا وتحفظينه وتخلصيله وعمرج ما تتخلين عنه لو شو صار …لان الي يحب عمره ما يتخلى عن الي يحبه؟؟؟ لو شو كااان
وبعدين ريال من دون شخصية سوري عالكلمه بس مب ريال ويطيح من عيون مرته نفسها قبل عيون الناس .؟ لول
المهم التفااااهم لول
عيناوي اصيل
مادري اذا كان قوي بس الواقع والحقيقة دايما يكون قوي ومر اخوي اصيييل
تحياتي ومشكور على توجدك الاول بمدونتي اخي الكريم
صحيح كلامك الناس أجناس وانت ورزقك وربك شو كاتبلك
موضوع حساس صعب ترد عليه لحساسيته وضعف التجارب عند الكثيرين بس خبرة الحياة تعلمك مثل مامبين انك ماخذ دروس بالحياه يا سالم
بنت الفـــــلاسي
جزاك الله خير وبارك الله فيك
وليس شرطا أن نستعجل الأمور لمعرفة الحقائق، فكثيرا ما يجب علينا الإنتظار
أشكرك على مقالك
موضوع جميل بس ما في مب مشكله لا تنسى انه الشرع محلل اربع اذا حرمه طلعت مو شيء على الواحد الى بالثانيه مواذا الثانيه والاولى اتفقو الواحد ما يغلط ويعرس الثالثه يشوفله قير فرند برع ويلبس الثنتين وجنك طايح في الرياييل والله الصراحه ما تفيجت اقرا الموضوع كامل مليت يا عمي لا تعور راسك في هذي الامور شوف موضوع حلو رومنسي شو هذا اشوف مواضيعك قامت ترد نفس قبل
بوسالم البريكي
صدقت…وكل شي نصيب…واللي الله يبليه بحرمة نسره مأجور…ويحل له الثانية والثالثة والرابعة بعد…
السلام عليكم ورحمة الله وبركاته
انا باااااااااااااااااك:)
انا عن نفسي اايدك بهالنقطه الاخ سالم انه الانسان بهالحاله الله سبحانه وتعاله يختبره بااقرب ناس له والزوج او الزوجه ماعليهم غير الصبر وعل ان شاءالله هالصبر يغير الطرف الثاني او يكون مااجور باذن الله ومافي اكبر من هالشئ
والله ان شاءالله يرزق كل واحد ويرزقنا ع ناس ع قد نستنا يارب
وطبعا انا عن نفسي امي اتقول يابخت الي بياخذج لووووووووووول اكيد طبعا هههههه ^_*
مع تحياتي
Malak UAE
يلى يا خوي وين الموضوع الثاني
السلام عليكم ورحمة الله وبركاته
أنا أؤمن بأن لو شو ما كان الانسان شرير وخبيث إلا ماتكون فيه بذره خير
يوجدها الطرف الثاني بتصرفاتها الزينة
يعني مثلا لو الرجال مثلا نفسه خايسة وخبيث
وبذر شي من حرمته طيبة وعاملته دائما بأسلوب راقي
وحفطتها وماقصرت معاه
بتظهر بذور الخير والطيبة اللي مدفونه في قلبه
والعكس بالعكس
يعني ما أعتقد واحد بيعاملك بكل طيبة وأخلاق وبترد عليه كل مرة بأسلوب خايس
إلا ما يجي اليوم اللي تستحي على عمرك وترد جزء بسيط من جمايله
فـ لو الزوج صبر على زوجته
والزوجة صبرت على زوجها
حياتهم بتكون من أروع مايكون
موضوع حلو
بس حضوري أحلى
خخخخ
الاخ سالم ناوي يسكر الموقع
وشكرا