السجن والتقريع وتنظيف الشوارع للمخالفين في ابوظبي؟
قرانا في الصحف المحلية عن قيام شرطة ابوظبي بمعاقبة المتهورين من السائقين الذين قامو بعمل فوضى وتقحيص وييلات بالسيارات خلال فترة احتفالات عيد الاتحاد وذلك عن طريق تقريع شعورهم ونشر صورهم من خلال الجرائد المحلية إضافة إلى أخذهم للمكانس وتنظيفهم الشوارع !!؟
وتفاجات بالامس عندما شاهدت صورهم وهم مقرعي الرؤوس ويقومون بتنظيف الشوارع من خلال الصور التي تم عرضها في صحفنا المحليه !!؟
نفس هذا القرار حسسني بالاب الي ما قدر يسيطر ويربي عياله صح ويوم يغلطو يضربهم ويستعمل اسلوب القوة معاهم؟ فهل هذا اسلوب صحيح؟
هذه الانواع من العقوبات قد تكون متواجده في دول الغرب بس هل وصل فينا التقليد بهم لهذا الحد؟ اني انا اقرع واسجن واذل الشباب في الشوارع ليش !!؟ ليش؟ شو الذنب الي سووه !؟ ناس يرتكبون الكبائر ومحد يقولهم شي !؟ اعاقب شباب مراهقين على تصرفات صبانية بالمذلة والفضيحة !؟
المفروض الشرطة كانت تعي ان في مشكلة عند الشباب، كان لازم اتتم السيطرة عليها بالوعي عن طريق وسائل الاعلام المختلفة …كان لازم يتم تنظيم المسيرات عن طريقهم هم انفسهم الشرطة ومايتركونها للجميع؟
كان لازم يحذرون الشباب قبل الاحتفالات بالعقوبه مب من الحين بدو فيها…. هذا اذا كانو يجوفون قرار مثل هل عقوبه صحيح؟
الشرطة عندهم قسم اسمة الشرطة المجتمعيه او مركز الدعم الاجتماعي …وين دورهم في وعي ونشر الثقافة لدى الشباب في مثل هذه المناسبات وغيرها ! وين اماكنهم؟ وين لمساتهم على المجتمع؟ رااوونا؟
في مشكله موجوده عندنا يا جماعة الخير يوم الشباب يطلعون ويقحصوون بالسيارات او يسوون فوضى معناته عندهم طااقة محتاجين يطلعونها …معناته في فراغ في اوقاتهم موجوود …معناته في قلة وعي موجوده لديهم …في مبالغة بالفرحة لازم يعرفون حدودها … ومثل هل قرارات راح تبني الحقد والكره في قلوب الشباب وليس مثل ما يتصور البعض انه بيكون رادع …حتى لو كان رادع …انا اذا بمتنع عن شي لازم يكون عن قناعة مب بسبب خوف لان اذا حصلت اقرب فرصة بستغلها في الفوضى واكثر بعد.
هذيلا الشباب الي زخوهم لازم يتم توعيتهم اولا قبل معاقبتهم …القوة عمرها ما يابت نتيجة ….فكرو فيها على المدى البعيد …انت تبي اتحبب الشباب في النظام والانتظام مب تفظحه وتنشر صورة واتخليه يمسك المكنسه ويينظف الشوارع …نحن عرب والعروبه والكرامه في دمنا وعزت نفسنا وكرامتنا ما تسمحلنا بمثل هل اشياء …
اضافة الى ذلك هل قرارات هل بيتم تطبيقها على الجميع ام فقط الفقراء لله !!!؟ للاسف الواسطات منتشره عندنا مثل الطاعون ….انا لو ولد ضابط او مسئول كبير هل بتتم معاملتي بنفس الطريقة !!؟ اشك لانه ياما جفنا حالات مخالف ناس طلعو منها فقط لاتهم عيال فلان الفلاني !!؟ ومافي داعي اضرب امثله
ارجو ان يتم دراسة هذه المشكلة قبل تطبيق أي قرار (الي للاسف اتطبق) ومعرفة اسباب فراغ الشباب وتوفير الموارد والنشاطات المناسبة لانشغالهم وعدم وجود فراغ لديهم لان الفراغ بيطلع مشاطل ثانية اكبر …وتوعيتهم التوعيه المناسبة …واذا كانت هناك فرحة فتكون ولكن بحدود الادب وعدم التخريب …توفير اماكن للشباب يسيرون ويخمسووون فيها ليل ونهار …خلوهم يفرغون طاقتهم كلها ….
هذه وجهة نظري قد يختلف معي البعض… بس كل حد برايه حلو
تحياتي
مباركن عيدك ياأخوي
أنا مثلك تفاجأت بالي صار
يعني هالمراهقين يقرعونهم ويخمون الشوارع
والمشبهين والمخنثين محد يسترجأ يقولهم شي..ليش حرية شخصية
كلامك سليم عن التوجيه وعن تفريغ طاقات الشباب في ماهو صالح
والغريب إنه دور التوعية المجتمعية غيب في هذه الحملة
عجيب هذا المجتمع الذي ننتمي له … فالقرارات الغير مدروسه والهوجاء ماادري من وين تطلع او من الي يقترحها
اول شي السلام وعليك اخوي سالم
اسمحلي اقولك اني ضد كلامك لان الشباب الطايشين شرات هييل يستاهلون انهم يقرعونهم و لو يحرموهم من السياير بعد احسن
لان يا اخوي السالفه فيها سالفه ارواح مب فضايح اذا عالفضايح خلهم ينفضحون عسب يحرمون يغلطون مرة ثانيه
تقبل مروري
اختكـ ـ ـ
باربيـ ـ ـ الاماراتـ ـ ـ
عائشة
بالامس شاهدت كليب فيديو لوحده يالسه لاتهز وتترقص بالمسيرة بطريقة مشينه للاخلاق والادب ولا حتى الرقاصات الشرقيات يسوونها !!؟ حد سووالها شي !!؟ قلت الادب والحيا والشواذ يدورون في الشوارع حد كلمهم !!؟ المراهقين ممكن انك تخسرهم ويحقدون في قلويبهم على النظام ويحملون الكره في قلوبهم لهذا الشي …بس مثل ماتفضلتي قرارات غير مدروسة وهوجااااء …والله المستعان
تحياتي ومشكوره على مشاركتج اختي عائشة
باربي الامارات
وجهة نظر احترمها من دون شك …بس ردي اقري مقالي …التاديب والنصح مايكون بمثل هل اساليب انك اتقرع وتسجن وتخليه يخم الشوارع …ليش هل مذله !!؟ هذه فترة مراهقة ولعب وطيش لازم يتم توعيتهم مب تعقيدهم …الشوااااذ ترسو الشوارع محد كلمهم !!؟ وغيره من الاشياء الي ما ابي اتطرقلها ..؟
وبعدين نحن كلنا عارفين ان هل قرار ما راح يعمم على كل حد ….فهني الطااامه الكبرى؟
ومرورج مقبول ومثل البرد على الصدر اختي باربي
تحياتي
مرحبا
ماشالله عليك وعلى مواضيعك المتنوعه وتحس كلامك دومه من الخاطر ومنطقي بعد
مرات ضحك ومرات جد صج مدونه روعه والاروع صاحبها
الاخ سالم ممكن ايميلك عشان اذا حبينا نتواصل وياك
بنت الفــــلاسي
اخوي سالم انا معاك بأن التأديب ما يكون بهالطريقه بس الشباب ما يوون الا بالعين الحمرة
و اذا عالشواذ المفروض انهم بعد يعاقبونهم بنفس الطريقه بس لو بتفكر معاي شوي بتلقى ان الشواذ هم يضرون نفسهم اكثر من اي شي ثاني ولكن المراهقين اللي يلعبون بسياير يضرون البشر كلهم جوف جم واحد راح فيها والسبب طيش شباب
لو بنتكلم عالاشياء اللي المفروض الدوله تاخذ موقف منها اشيا وايد ما بنخلص
اختكـ ـ ـ
باربيـ ـ ـ الاماراتـ ـ ـ
بنت الفلاسي
مشكووورة اختي وهذا من ذوقج ولو اني احس انه مبالغ فيه شويه لول
وسالفة الميل صراحة استحي احطه جي على العام لول
مشكوووورة على تواجدج وانشالله انشوفج اكثر
باربي الامارات
نحن متفقين يعني ان التاديب مايكون بهل طريقة …بس هذا الي انا ابي اوصله والامور الثانية انا وياج فيها شكلا ومضمونا لوووول
تحياتي لج يا باربي صراحة وتواجدج الدايم والله يسعدني ماشالله عليج بس …الله يحفظج
تحياتي
السلام عليكم
اولا احب اقولك ان الموضوع الي طرحته وايد مهم ويهمنا كلنا لان هذولا شبابنا وعيالنا واخوانا لازم كان العقاب يكون بعد الانذار مب جيه خذوه فغلوه بعدين ان الانسان يمتهن بهطريقه ترا وايد صعب الله يعينى ومشكور اخوي على الموضوع
عســل دوعــــن
السلام عليكم الجميع الصراحه في بع الشباب والله يا اخ سالم كانو يسوقون بطريقه جنانيه شوي عليهم انا بسالك شو ذمب العوائل الي توفت في المسيره بسبب طيش ناس الله يهديهم والحمد لله على كل حال وانا اشوف انه الحل مع الناس هذيل يبالهم يسوولهم نفس ام القيوين مساحه مسكره يخلونهم يلعبون على راحتهم في المناسبات والي يبي يموت برايه روحه وعندهم الاسعاف حتى موجود كل واحد وعقله والله المستعان لكن في منهم والله الي يستاهل
بوسالم البريكي
عسل دوعن
مشكووور على مشاركتك اخي عسل وكلامك عسل دوعني اصلي لول
بوسالم
اخوي احمد حلك هذا انا قلته يسووون شي للشباب يفجرون كل طاقاتهم فيه
ومشكووور على وجودك يا نائبي الدائم
تحياتي