التوظيف والتوطين
في الأسبوع الماضي قمت بزيارة لمعرض التوظيف الذي اقيم بقاعة أرض المعارض بإمارة أبوظبي، شخصيا لم أكن أود الذهاب الى هناك لكي أقدم أوراقي لوظيفة جديدة ولكني أردت أن أرى مدى مشاركة القطاع الخاص والحكومي ودورهم في استقطاب الكوادر الوطنية خصوصا في إمارة ابوظبي، وخصوصا أنه وفي تدوينة سابقة عن معرض التوظيف في دبي، ذكرت بأن هنالك انقطاع شبه كلي من الشركات والموؤسسات الضخمة في ذلك المعرض، فإليكم ملاحظاتي البسيطة في هذا المعرض:
-
صدمت عندما رأيت حجم المشاركة الضئيلة من القطاعات المختلفة سواءا كانت خاصة ام حكومية، وبالتحديد وأعيدها وللمرة الثانية الشركات العقارية العملاقة في إمارة أبوظبي مثل صروح وطموح والدار والقدرة ومنازل وغيرهم ممن لا يخطرون على بالي حاليا، لا أعلام هذه الشركات تملك من الميزانيات الشيء الضخم لماذا لا يصرفونها على الكفاءات من أبناء البلد؟
-
قبل عدة أيام وأثناء معرض سكاي أبوظبي للعقارات ذهبت هذه الشركات إلى أكاديمية الإمارات وغيرها من الأكاديميات لأخذ مواطنات (يعني بنات مب شباب) وذلك للمشاركة معهم فقط أيام المعرض على الستيج على ان يعطوهم قدرا من المال مقابل اليومين الذين سيقفون بها هناك وشهادة خبرة !!؟ شهادة خبرة على وقفة على ستيج !؟ وبعدين كل وحدة أترد الأكاديمية !؟ أنا ماعرف هل جهات يشوفون بناتنا سلع رخيصة للعرض والترويج !؟ أم أنهم شحاتات لبضعة دراهم !؟ زين وضفوهم ، خذوا مواطنين، بدل لا تدفعون للوافد 30000 ثلاثين الف درهم عطوه لابن البلا هو اولا بهم والله !؟
-
لم ألاحظ دائرة أو هيئة حكومية مشاركة !؟
-
معظم المشاركين حاطين بنات على الستيج الخاص بهم وكل وحدة أتقول أنا اكشخ من الثانية !؟ جنهم سايرات عرس ولا حفلة !؟ يعني صج بناتنا صارو اداة عرض وترويج؟
-
معظم الجهات المشاركة يقولون لمقدمين الأوراق، ادخل موقعنا وشوف الشواغر وحط حسب شاغرك، زين انا ابي اعرف انتو ليش مشاركين !؟ هذا شيء كلنا نعرفه.
أعتذر على اعادتي لهذا الطرح ولكني والله مقهور وحاس بغيرة على بلادي وامارتي، اباها اتكون احسن من جي وانشالله بتكون.
Posted by
at
13:07:06
الله يوفقك يا سالم على تدويناتك الي تمسنا وتمس حياتنا الخاصة وأنا اشوف ان جميع تدويناتك منا وفينا
الله يوفقك والى الامام
هممممممممم
نقاط مهمة اللي ذكرتها سالم وملاحظاتي نفس ملاحظاتك تقريبا في معارض التوظيف
بارك الله فيك وإن شاء الله تتحقق أمانينا وتتحسن بعض الأوضاع الغير مقبولة في معارض التوظيف…
وبالنسبة للنقطة الثالثة
معارض اليوم تطورت وااايدعن قبل .. بداية المعارض كانت بسيطة وجدية شوي..وكل حد في حاله..
أوراق في يد وقلم في اليد الأخرى وحقيبة نسخ الأوراق المطلوبة والكل منشغل في السؤال عن المكان وطبيعة الوظيفة آملين 80% الحصول على الوظيفة
أما معارض اليوم
فحدث ولا حرج !!
الميكب والقصة والعدسات والكندورة والعقال قبل كل شي!
والله المستعان
العيب مب فيهم العيب فينا انا اعرف واحد يداوم في دائرة حكومية وهذا المصدر موثوق قال لي انا خبرت فلان ” يدور على وضيفة “انه عندنا وظايف شاغرة وقلت له سير قدم وان شالله بيقبلونك واتفاجات انه الريال يتصل بي بعدة فترة قال لي ان سار للمدير وقال انهم مكتفين بصراحة استغربنا كيف قال جي !! سرنا نبا نعرف شو السالفة ليش رفض طلبهم والا الاستاذ موضف من برا البلاد ومب واحد ((((((9)))))) وافدين !!!! بصراحة قال نحن استغربنا وصابتنا غصة وقهر قلنا هذا المدير اللي اللي يساعد عيال بلده ويحقق التوطين والمشكله مب هني مسوين لجنة يسون مقابلات في الاردن ومصر عسب يبون موظفين !!!!!!!! شو رايكم اترك لكم التعليق
السلام عليكم ورحمه الله وبركاته
في البدايه اشكر اخي وصديق العزيز سالم على الموضوع المهم
الصراحه بخصوص المعارض انا ما عندي وايد خلفيه عنها بس احسها احسن من اول ببعض الامور وفي تحسن طبعا ملحوض
وبخصوص الدوائر الحكوميه او المحليه في فرق بين قبل والحين في توجه كبير نحو التوظيف وخاصه توظيف المواطنيين والمواطنات بس مب هاك الفرق الي كنا ننتوقعه
ومثال على ذلك :وهذا الكلام من شباب يشتغلون في الجيش ومب واحد اكثر من واحد
بصراحه يقولون نحن نشتغل ومعاشاتنا كم بقول 25000 وهذا طبعا مستحيل انا بقول ما عليه بس يقولون الحارس الي عند الباب بس يقول يفتح الباب حق المواتر الي تدخل وتظهر واونه يفتش يعني تخيلوا كم يستلم والله انا تخبلت
من 30000 لين 60000 ليش اجنبي
وسبحان الله يصادف هذا الموضوع ان اليوم كنت اكلم واحد من الشباب يديد في دو يقولي في قسم عندنا في 30 موظف تخيلوا بينهم 3 مواطنيين بس بس الخبر الجيد ان الحين قاموا يتخلون عن بعضهم وفي احتمال بسبب التوطين
بصراحه الحكومه ما تقصر ضاغطين على الدوائر الحكوميه والمحليه
بس بخصوص الدوائر الحكوميه بعد ما قصروا في الفتره الاخيره في تطور بس بعد يبيله وقت وبعد يا شباب نحن ما نقدر كل شي نقول الحكوميه والحكوميه يعني الدوائر الحكوميه لا تستطيع ان تلبيه هذا الكم الهائل من المواطنين الذين يردون شاغر للعمل
سواء جامعي او ثنويه عامه
فالحمد لله في تقدم ولكن نتمنى المزيد والمزيد ولكن يحتاج الى الوقت ولكن لا اعتقد ظل لدينا وقت لان بتصوري مع حلول عام 2010 سيكون من الصعب جدا الحصول على وظائف شاغره كما نجدها الان في مكان مميز وفي منصب مميز وبراتب مميز
ويسوف يرتفع مقياس التوظيف كادنى حد هو الشهاده الجامعية (بكلوريوس )فهذا اقول يجب ان لا نضع اللوم على الحكوميه فقط بل الخاص اكثر لان الحكوميه اصبحت مايسمى بالتشبع او شبه تشبع من ناحية التوطين
الصراحه انا اشوف وايد مواطنيين ينتظرون ويصبرون شهور وربما سنين عشان وظيفه يعني الحبيب يقدم السيره الذاتيه يروح وبعد شهر يقولون مقابله وبعدين روووح لين ثلاث شهور بعدين يفكرون بعد يمكن يقبولونك ويمكن لا ما اقول غير الله يصبرنا والله المستعان
===================================================
الحين موضوع البنات بصراحه وبكل صراحه انا اخالفكم الراي تماما لا تقولون بناتنا وبناتنا اسمحولي بس بكل الصراحه محد بيي يجبر انسان على شي شوف البنت هي الي وافقت البنت هي الي تمكيجت البنت هي الي تحب هالشي لجذب انتباه الجنس الاخر واكيد مب كلهن بالعكس في من البنات الي ما تسمح لنفسها انها تفكر مجرد التفكير انها تكون في هالمكان او اذا كانت باسلوب صح وبطريقه صحيحه ومحتشمه لفائده وخدمة المجتمع يعني اذا حصلت وحده من هاييل فبتساعدك على حل مشكلتك اما البنات على قولتكم مكياج وكريم اساس شو بقول بس خير انت تبي تدور على وظيفه ولا تبي تسالها شو نوع عطرج الي واصل ريحته لين باب المعرض فالله المستعان
وبما ان تطرقنا لهذا الموضوع فاقول مب بس بنات في شباب بعد وااااااو في معرض خلاص بسجل اسمي عشان اكون على الاستيج ياسلام بناظر وبمنظر وبشوف الي رايح والي ياي ( بجحل عيني ) يعني هذا وين بيهتم اذا واحد ياي بيقدم وظيفه اكيد بيقوله روح الموقع وجيك اهناك فيعني مثل ما يقال دائما
مب اصابع يدينك كلهم شرات بعض سواء البنات او الشباب
======================================================
اما بخصوص الموقع فالي صاير الحين وممكن الحين مب وايد ومع مرور الزمن خلاص كل شي الكتروني تقدم وظيفه تشتغل … الخ
على ما اعتقد هم يبون يكثفون موضوع ( الإي ) سواء اي بزنس او غيره
وممكن في بعض الفئه من الناس مثلا الي عندهم ثنويه عامه يقدمون عن طريق النت او الوافدين مثل شركة دو حق التوظيف الوافدين عبر النت يعني ممكن في سبب او مثل ما قلت زياده استخدام النت لحل المشاكل والله اعلم
——————————————-
أما اخي الكاتب فتعليقي على كلامك
خلنا شباب منطقيين شوي يعني انت اذا عندك شركه او دائره او اي شي
واتييبلك 9 يشتغلون لك كلهم ما يكلفك 9000
ولا اتييب واحد ويشتغل ويكلفك 9000
انا معاكم نحن مواطنين ولنا الاولويه والخ بس ياخي شوفوا المواطنيين الاستهتار الي صاير يعني انسان مب محتاي وظيفه بس يشتغل لان عنده واسطه وما يشتغل يداوم اي كلام ويطلع في نص الدوام والخ ترى هذي الاشياء تشوه سمعتنا فبتالي لازم الريال بيفكر بمصلحته انا اييب مواطنيين ما يشتغلون ويراتب فوق ليش اييب وافد بدال الواحد عشر ويشتغلون لا يغيب لا اجازات مرضيه لا شكاوي ولا عوار راس
صح البعض مب الكل بس انا وانتوا ندري بس انسان كاداري ما يفكر شراتنا لا يقول مصلحتي هالمشكله يعني عيزنا ونحن نتكلم والناس تتكلم بس لين وين الله اعلم
بس مع هذا في امل وما شاء الله التغير مستمر ولكن نطمح ونطمع ايضا بالمزيد ولكن ايضا لتغير شي ما في مجتمع ما يحتاج الى وقت طويل وليس بهذه السهوله التي نتصورها
============================================
في النهايه اشكرك كل من علق على الموضوع وشكر خاص لاخي وصديقي العزيز سالم
والسموحه منكم اذا قلت كلام ولا شياته واذا طولت في الكلام عاد اول مشاركه لي
والسموحه منكم مره ثانيه
تحياتي
فنان الإمارات
اولا انا احب اشكرك على هاالاهتمام بالموضوع
لانه من المواضيع المهمه فعلا احنى ما نعترض على سياستهم في التوظيف او عن استغلال البنات كاداة لا احنى نقول نبى حل لمشكلة البطاله الي صايره عندنا نبى كل مواطن تخرج يشتغل ويطور عمره نبى توطيييييييييين
شكرا على مواضيعك الي تطرحه يا اخ سالم
الاخ سالم
هذه هي مشاركتي الاولى في مدونتك ، وانا احييك على اطروحاتك الجريئة جدا والي قلما نشاهدها فالمدونات الاخرى
اتفق معك في موضوع استخدام البنات كأداة ترويج فهذا الامر كنا ننتقد الغرب عليه وأذا بنا اصبحنا مثلهم
بالنشبة للشركات الضخمة فمن الواضح انك مضطلع جيد بما يجري هناك والا لما حرقت دمك واعصابك من القهر
اتمنى ان تقو الشركات والدوائر بالقيام بالاعمال بالطريقة المثلى وليس مجرد شكليات امام المسئولين
شكرا اخي سالم على طرحك المفيد
ماشاء الله فنان الامارات … صدق فنان ..
كفى ووفى وماخلى شي نقوله ..
صدقت بكلامك والله ..
والحمدلله انك قلته ماكان فيني اقول كل هذا لوول
احيي قلمك اللي كتب ..
واحييك اخوي سالم على غيرتك وسعيك لرقي الدولة
راشد
شكرا على مرورك الطيب اخي الفاضل
كناري
للاسف المشاركين في معارض اليوم هدفهم الرئيسي هو الاظهار لمسئوليهم عن مدى اهتمامهم واتباعهم لسياسة التوطين، لكن فعلا والكثير منا يعلم ذلم انها مجرد شكليات لاظهار الجانب المشرق ولكن عندما تذهب الى مقر هذه الجهات ترى الجانب الاسود وهو عدم وجود التوطين الفعلي وبالتحديد للكفاءات، الواسطات بتحصل بس كفاءات صعبة !؟
كـــــاتب
تحياتي لمشاركتك الاولى في مدونتي اخي الفاضل
عاد انا لو خبرتك عن القصص الي انا شفتها شو بتقول، انا لست ضد توظيف الوافدين فلهم من الفضل الكثير عليناـ فالذي درسني كان وافد وسواق الباص للمرسة وافد وراعي الدكان وافد والي بنا بيتي وافد وغيرهي وغيرها من الامثلة، ولكن الوضع حاليا اصبح في تغير ففي السابق كان عدد المواطنين وبالتحديد المتعلمين منهم محدود جدا، اما الان ففي كل تخصص تجد مواطنين من دولة الامارات، خصوصا اذا ما رأينا أن الظروف الدراسية والاجتماعية التي مررنا بها افضل من اي شخص من دولة اخرى، منذ مرحلة دراستنا فالمدارس وحتى تخرجنا من الجامعة، فالدولة لم تقصر في حقنا ودفعت من اجلنا الغالي والنفيس من اجل تعليمنا، سواءا من تعلم خارج الدولة او داخل الدولة
لكن المشكلة في غالبية الجهات الخاصة والحكومية وخوف المسئولين على كراسيهم هي مربط الفرس، يمكن لانهم نسوا ان الارزاق من عند الله وليس من الكرسي الذي هو جالس عليه
تحياتي
فنان الامـــارات
صراحة مشاركتك كانت قمة في الروعة وصراحة اطربت الموضوع بحديثك وامثلتك السلسة وصراحة اتفق معك في كل المواضيع التي ذكرتها ولن اعقب على اي منها لانك كفيت ووفيت وما ذكرته من امثلة موجوده بالمواقع مع اني اتحفظ على بعض الامور ولكني لن ادخل بها حتى لا يتشعب الموضوع
ولكني سأتطرق الى نقطة واحدة فقط وهي مسالة عدم مبالة المواطنين للعمل وهروبهم أثناء الدوام الرسمي وغيره من الامور الاخرى
المثل يقول لو كان رب البيت بالدف ضارب …فشيمة اهل البيت الرقص؟
اذهب الى معظم دوائرنا الحكومية وهيئاتنا (طبعا هذا الامر خف حاليا بسبب تغيير الهيكلة الادارية في كل مكان، فبالتالي كل حد يبي يثبت نفسه) ، ستجد ان المسئولين هم اول من يستهتر عن الحضور للدوام الرسمي وهو الذي تتأخر المعاملات على مكتبه بالشهور وهو الذي يخرج أثناء الدوام الرسمي الى سوق الاوراق المالية لمتابعة البورصة (طبعا هذا قبل خدمة الانترنت)،فماذا تتوقع ان يكون حال من هم تحته !؟ أهم شي الراس الكبيرة اذا عرف المسئول يتابع موظفينه ويحثهم ويحفزهم وشافو فيه الاهتمام صدقني بيكونو نفس الشي، وهذا الشي شفناه وجربناه مب فالامارات بس حتى برع الامارات
وبالنسبة للنظرة التي ينظرون بها للموتطنين بانهم كسولين ومتقاعسين ، هذه النظرة في علم الادارة تسمى Stereo Typing
ومن الصعب جدا ان نغير هذه النظرة لدى الجميع لانها ستحتاج الى اجيال من التغيير
وصراحة اخي فنان مشاركتك اسعدتني واثلجت قلبي واتمنى وجودك ومشاركتك معي في تدوينات اخرى واذا أحببت أن تضيف اي جدبد على هذا الموضوع فلك المجال والضوء الاخضر
ففي النهاية نحن نتعلم ونستفيد من تجارب بعضنا البعض
مــــــــهاري
اشكر لكي متابعتك الدائمة لمدونتي ومشاركاتك الفكاهيه الدائمة، بس غريبة اليوم جاده مو من طبعج، اكيد معصبة :((ك
ميثة الامورة
شكرا على مشاركتك الاولى اختي الكريمة، ومثل ماتفضلتي نعم انا على اضطلاع بهذه
الشركات وعلى علاقة بالكثير ممن فيها من جي مقهور لول
عيون الحب
زين عيال رايح اصابعج فنان الامارات لوووووووول
مشكورة على مشاركتج ومرورج
تحياتي القلبية للجميع
اشكركم جميعا على الاطراء
وانا اوافقك الراي اخي سالم ومثال على ذلك وليس ببعيد
امسات واحد من الشباب اتصله الصبح بعد السلام والتحيه قلت له وينك قالي في الدوام بعدين في نص الكلام قالي اقولك بصراحه انا مب في الدوام طالع قلت ليش تاخذ اجازه وايد مب زين قال من قال اجازه ههههه المدير مب موجود وانا يحضروني وهو في دائره حكوميه يعني مثل ما قلت اذا المدير والمسؤول يخالف ومب مهتم ومتسيب فهذا بيكون دافع او تجشيع للي تحت فانا معاك بس الحين قل عن قبل ولازم يحطون امر حازم للي يخالفون او شي من هذا القبيل للتقليل اكثر واكثر حتى ما تنعدم الظاهره هذي
ومثل ما قلت سابقا وانت ذكرت واكرر لتغير سلوك البشر يحتاج لفتره زمنيه طويله والحمد لله نحن في تطور مستمر والحمد لله ونتمنى ان نكون دائما وابدا في مقدمه المجتمعات والامم
واشكركم مره اخره
لكم مني فائق الاحترام والتقدير
فنان الإمارات
ليس الموضوع شركات القطاع الخاص او الحكومي ودرهم في استقطاب الكوادر الوطنيه
ولكن يجب ع الدوله ايجاد استراتيجيه لتمنيه الموارد البشريه وحسن استغلال لهم يكون ذلك بزيادة المستوي التعلمي العمل ع تدريبهم وتأهليهم منذ المراحل التعليم الاول والمتوسطه والثانويه ومن ثم دخولهم للجامعه او المعاهد تمهيدا لدخولهم سوق العمل ايجاد استراتيجه لخريجي الثانويه العامه للحصول ع التدريب المهني متخصص في اكثر من 15 مهنه
ايجاد خطه ع مدي عامين في السيطره ع البطاله وتخفيض معدل البطاله ويكون ذلك لتوظيف الاماراتين بعد ان يتم تأهليهم الي المستوي الذي يمكنهم شغل العمل المسند اليهم
وبذلك قد نكون اهالنا شبانا للسوق العمل بخبره وكفاءه
بالنسبه للبنات حواء قبل 6 شهور اجرينا استبيان في دائره حكوميه خدميه بمعني ان اكثر زوار هذه الدائره من الرجال كان الاستبيان عن اهميه وضع المكياج في العمل عدد البنات في الاربع الاقسام 100 جمعيهم شاركوا في الاستبيان يعطيهم الف عافيه كااان نتائج الاستبيان ان المكياج يعطي ثقه بالنفس ومشهده نظرات الاعجاب من الجنس الاخر
طبعا اجرينا الاستبيان في كليه كاان اكثر من ردوا ع الاستبيان بويات لايحتاجون الي مكياج لكن المهم بالاستبيان ان 90% المكياج مهم جدا
انااااا ابرار ذلك بظعف الوزع الدينا الله يهدي بنتنا
سمنه ع عسل ولا سمن ع عسل ذكرتني بمصريه متجنسه هههههههههههه
تحياتي للجميع
السموحه في البدايه على الخطا في تعليقي السابق وهو عباره عن ما تنعدم الظاهره هذي ويجب ان يكون تنعدم هذه الظاهره .
اما بخصوص تعليقي على رد القلوب الساهيه
بصراحه تدريبهم وتأهليهم منذ المراحل التعليم الاول والمتوسطه والثانويه لابد منه ولكن هذا موضوع ثاني واذا تكلمنا فيه بناخذ وقت وبنظهر من الموضوع الاساسي لازم ندرب وتاهل المتعلمين من البدايه للنهايه وغيرها
وان شاء الله الاخ سالم يفتح لنا موضوع خاص بخصوص التعليم عندنا ومقارنة بالتعليم في الخارج وغيرها او ممكن فتحوا موضوع مثل هذا وانا ما اعرف فاتمنى وضع الوصله للموضوع
والسموحه وبانتظار الرد منك اخي سالم والمزيد من التعليق من الاخوان على هذا الموضوع
تحياتي
فنان الإمارات
القـــلوب الســــــاهية
بالنسبة لاستراتيجية تنمية الموارد البشرية ضمن مراحل التعليم ، فهذا امر موجود ومتبع ضمن الثانوية الفنية ولكنها كما ذكرت مقتصرة فقط على مرحلة الثانوية، وليس مراحل التعليم الصغرى
جميل ان نسمع ونقرأ اقتراحات مماثلة لما طرحته يعكس عن مدى شمولية النظرة التي نملكها من مواطنين الامارات ولو اعطينا الفرص كلا منا في مجاله ومكان عمله على اتباعها وتنفيذها لاصبحت الاوضاع في عدة اماكن افضل من الان بس مثل مايقول المثل الانجليزي
it takes time lool
بالنسبة لموضوع المكياج والاستبيان اعتقد انه يعطيهم ثقة بالنفس لان عندهم ضعف بالثقة بانفسهم !!؟
الحين الميكاب اصبح قوة وعزيمة ودافع للثقة بالنفس !؟ الله يهدي من يعتقد هذا الاعتقاد ويقوي من ايمانه
وين راحت الشخصية وقوة الارادة واسلوب المحادثة وقوة العلم وغيرها من الامور التي تنمي من شخصية الانسان
الله يهدي الجميع ويحفظهم
ومشكوووووووووووورة على توجدج
زين قلتيلي ضحكتج سمنه ع عسل !!؟ زين شو رايج بزبدة على مربى لول اخاف سيلانية متزوجة مواطن لول
فنان الامارات
هذا موضوع ضخم ومحتاج الى جمع بعض المعلومات قبل الخوض به
انشالله بحاول اكتب عنه متى ما سنحت لي الفرصة المناسبة بما املك من معلومات
تحياتي اخي الكريم
نشكــراً على الموضوع المهم ..
بلكن ما لحظته على أكثر الردود أن الكل مهتم لفئة الثانويه العامة وكيف يوظفونهم من خلال تدريبهم وتأهيلم للوظائف ..!! انتوا بهالطريقة اتشجعونهم للعمل وانهم ما يكملون دراستهم ..شو خليتوا حق الجامعيين ! المهم هذا مجرد تعليق والسموحة..وفي انتظار مواضيع الجميلةوالهادفة..
اشكرك على هذا الموضوع الشيق واللي لاحظت مثل(^_^) انه تركز حول توظيف فئة الثانوية العامة ونسووو الاهم خريجين الجامعة والتقنية اللي هم الفئة الاكثر بطالة..
وعندى ملحوظة المشكلة مب في الشركات المشكلة في المسؤؤلين اللي ما قادرين يحلون هالمشكلة ومخلللين الجنسات الثانية تتحكم في فئة المواطنيين وعذرهم اننا ما نشتغل وما نعرف شي..
في البدايه اشكر كل من ^_^ و دلوعة ريلها
على المداخله والتعليق واتمنى ان نحضى دائما بمداخلاتكم وتعليقاتكم
بس حبيت اذكر شيء الجميع حبذا لو اي حد يبي يداخل ولا يعلق يقرا جميع الردود قبل الرد والتعليق او المداخله الي يبي يداخلها
و دلوعة ريلها ^_^
الاخ سالم فتح الموضوع التوظيف والتوطين وكان يقصد فيها بشكل عام وجميع المراحل وانا في مداخلتي بعد نفس الشي بس بعد ما الاخت القلوب الساهيه دخلت وذكرت التدريب للمراحل من التاسيسي للجامعي بعد الاخ سالم رد قال حتى ذكرت في مداخلتي الثانيه ان هالموضوع بيخلينا نظهر من الموضوع الاساسي وموضوع التاهيل والتدريب جميع المراحل هذا بروحه موضوع ثاني ومتشعب عشان جي في احتماليه ان الاخ سالم يفتح الموضوع خاص له في المستقبل ان شاء الله
وعلى العموم ما يخصه التدريب في التوظيف وايد يعني في وايدين بس عشان عندهم ما يسمى حاليا بفيتامين (و) خلاص توظف وهو ما يعرف شو السالفه
وان شاء الله بناقش الموضوع في وقته اكثر وبالتفصيل ان شاء الله اما الحين فخلنا مع التوظيف والتوطين بشكل عام وبمجمله
يعني ممكن نقول ان الواسطه احد اسباب تاخرنا في التوظيف والتوطين وايضا نقطه مهمه عندما نريد ان تنتكلم عن التوظيف والتوطين لازم على طول نشوف من مدير الموارد البشريه الي يقولون بالانجليزي هيومن رسورس ترى اذا مواطن بييب مواطنين بس اذا وافد بيمزر الشركه او الدائره وافدين
اتمنى مداخلتي او تعليقي ما زعل حد ولا ضايق حد والسموحه من الجميع
تحياتي
فنان الإمارات
اخي العزيز هاكونا ماتاتا
السلام عليكم ورحمه الله وبركاته
اشكرك على مداخلتك
بس عندي سؤال من قالك ان الاخ سالم وكل الي ردوا وعلقوا قالوا ان الدولة ظالمتنا ونحن مب راضين ورافعين رايه < االدوله المقصره > ؟
نحن نتكلم عن الشركات المساهمه ونعلم جميعا ان في بعض دول العالم ليش لديهم ولو بنسبه 1% من الي نملكه ودائما نشكر سبحانه وتعالى على هذه النعم التي لا تعد ولا تحصا والحمد والشكر ان اولياء امورنا( شيوخنا ) جميعهم وبلا استثناء لم يقصروا في حقنا ابدا وقد لا يعلم الكثير من الناس ان لا تقر لهم اعين حتى يرونا في سعاده وهناء فنشكر الله عز وجل لان من علينا بافضل حكام ولا ابالغ في ذلك واشكر جميع الحكام على ما يبذلون من جهد في سبيل سعادتنا .
ولكن نحن نناقش او بالاحرى ضاق باخينا سالم ان راى قلت تواجد الدوائر الحكوميه وايضا بعض الشركات الضخمه في الدوله وليست الدوله نفسها فاذا قلنا تقصير من الدوله فلما قامت المعارض والمؤتمرات وغيرها لحل بعض الصعاب التي تواجهنا .
ولا نقول للانسان الذي يبحث عن وظيفه اخرى لكي يرفع من مستواه المعيشي والدراسي وغيرها انه يطمع وليس يطمح بان يحصل على المنصب والنوم لا بالعكس قد ارى ان الوظيفه التي انا فيها الان لاتشبع طموحي وقد لا اجد فيه المكان المناسب لي لاسباب كثيره وقد يقيد مسيرتي الدراسيه وقد وقد وقد برغم من ان لدي راتب يتمناه الكثيرون ولكن لن اجعل من اولويات حياتي وطموحاتي بان تتحطم من اجل راتب
وربما يرى بعضكم في كلامي انني فضائي او معقد او من زمن الجاهليه لان اليوم يوم المال مثل ما يقولون ( ماني از توك ) بس اذا خذيناها منطقيه اقلها انا اذا طلعت من الوظيفه وسرت في مكان اقل راتب وكملت دراستي واتاحوا لي المجال او اي شيء اخر بعد ما اخذ الماستر او الدكتوراه او اي شهاده فنيه مثل ال سي بي ا للمحاسبه على سبيل المثال بتاكيد بان سيكون راتبي بعدها ضعف الراتب الذي اعطوني اياه في الوظيفه الاولى والكل كان يتمنى ذاك الراتب .
حكامنا في دولتنا الحبيبه مب مقصرين والفرص متاحه للجميع واحتمال كبير واكيد بنواجه صعوبات في مسيرتنا سواء في الحياه بشكل عام او الوظيفه والتوظيف بشكل خاص ولكن الانسان الطموح لا يقف امام اول عائق له ويصاب باليأس وانا متاكد الاخ سالم ليس الاخ سالم فقط بل كل مواطن اماراتي اكررها واقول يطمح وليس يطمع لحياه سعيده له ولعائلته ولابناءه من بعده .
السموحه منكم جميعا اذا اطلت في مداخلتي هذي او تعليقي وخاصة منك اخي هاكونا ماتاتا واتمنى محد خذ بخاطره او زعل واذا في شي في خاطركم من ضيق او زعل ولو ذره باتجاهي بس اتمنى يقولي اياها واذا في اي سلبيه في مداخلاتي وتعليقي بعد اتمنى تخبروني عشان اصححها اذا ماشي على الغلط واغير طريقتي او اعدلها اذا يبيلها تعديل واكرر السموحه منكم جميعا وتمنياتي للجميع بالتوفيق والصحه والعافيه
تحياتي
فنان الإمارات